ខេត្តព្រះវិហារ ស្ដ្រីម្នាក់ឈ្មោះសួងសបានដើររកប្ដីរបស់ខ្លួនពេញទីរួមខេត្តព្រះវិហារកាលពីថ្ងៃទី១៥សីហា២០១៥ដោយសារមិនឃើញប្ដីចូលផ្ទះដូចសព្វដងប៉ុន្តែអកុសល្យមកដល់រសៀលថ្ងៃទី១៧សីហាត្រូវបានសមត្ថកិច្ចនគរបាលខេត្តស្រាវជ្រាវរកឃើញសពជនរងគ្រោះនៅក្នុងព្រៃត្រង់ភូមិប្រើសក្អកឃុំម្លូរព្រៃ២ស្រុកឆែបខេត្តព្រះវិហារសង្ស័យករណីចោរប្លន់សម្លាប់យកម៉ូតូ១គ្រឿង។ភ្នាក់ងាររាយការណ៍ថាជនសង្ស័យត្រូវសមត្ថកិច្ចនគរបាលចុះប្រតិបត្តិការចាប់ឃាត់ខ្លួនភ្លាមៗនៅរសៀលថ្ងៃទី១៧សីហា២០១៥ខណះកំពុងជិះម៉ូតូតាមដងផ្លូវនិងបានដកហូតវត្ថុតាងម៉ូតូ១គ្រឿងម៉ាកហុងដាសេ១២៥ពណ៌ខ្មៅស៊េរីឆ្នាំ២០១២ពាក់ស្លាកលេខ១D២០៦១របស់សពជនរងគ្រោះមកវិញ។
ដំណឹងនេះមានការភ្ញាក់ផ្អើលដល់ប្រជាពលរដ្ឋក្នុងមូលដ្ឋានហើយបានសម្តែងការអាណិតគ្រប់ៗគ្នាព្រោះភាគច្រើនមហាជនស្គាល់គាត់មានមុខរបររត់ម៉ូតូឌុបប្រចាំគោលដៅផ្សារកំពង់ប្រណាកក្នុងក្រុងព្រះវិហារ។សេចក្ដីរាយការណ៍ថាជនរងគ្រោះរស់នៅចំណុចទួលកាំភ្លើងធំក្នុងភូមិទ្បឥដ្ឋសង្កាត់កំពង់ប្រណាកក្រុងព្រះវិហារហើយប្រពន្ធរបស់គាត់លក់បន្លែបន្តិចបន្តួចនៅផ្សារកំពង់ប្រណាក។
សមត្ថកិច្ចនគរបាលខេត្តបានអោយដឹងនៅរសៀលថ្ងៃទី១៧សីហាថាជនរងគ្រោះឈ្មោះគង់លន់ភេទប្រុសអាយុ៤៨ឆ្នាំមុខរបររត់ម៉ូតូឌុបត្រូវជនល្មើសចាក់នឹងដែកឆាបវាយនឹងខ្សែក្រវ៉ាត់និងវាយសម្លាប់នឹងដុំថ្មបែកមុខមាត់មើលលែងស្គាល់ហើយស្លាប់នៅនឹងកន្លែងស្ថិតនៅភូមិប្រើសក្អកឃុំម្លូរព្រៃ២ស្រុកឆែបខេត្តព្រះវិហារ។
តាមការសួរចម្លើយជនសង្ស័យឈ្មោះសួនសារិទ្ធភេទប្រុសអាយុ១៩ឆ្នាំនៅឯស្នងការដ្ឋាននគរបាលខេត្តព្រះវិហារបានឆ្លើយសារភាពថាករណីប្លន់សម្លាប់យកម៉ូតូនេះវាមានគ្នា២នាក់ហើយម្នាក់ទៀតឈ្មោះតុលាហៅញាក់បានរត់គេចខ្លួន។ជនសង្ស័យទាំង២នាក់នេះរស់នៅក្នុងភូមិឃុំកើតហេតុ។ជនសង្ស័យនិយាយសារភាពចំពោះមុខសមត្ថកិច្ចជំនាញថាពិតជាបានប្រើដែកឆាបចាក់ជនរងគ្រោះនិងយកដុំថ្មវាយសម្លាប់ប្រាកដមែន។ជនសង្ស័យត្រូវនគរបាលរៀបចំកសាងសំណុំរឿងបញ្ជូនខ្លួនទៅកាន់តុលាការខេត្តដើម្បីវិនិច្ឆ័យទោសទៅតាមផ្លូវច្បាប់។
លោកកែវចំរើនស្នងការរងនគរបាលខេត្តទទួលបន្ទុកការិយាល័យកណ្តាលយុត្តិធម៌បានអោយដឹងយ៉ាងខ្លីថាជនសង្ស័យឈ្មោះសួនសារិទ្ធភេទប្រុសអាយុ១៩ឆ្នាំពិតជាត្រូវបានចាប់ខ្លួនប្រាកដមែនពីបទសម្លាប់យកម៉ូតូ។
តាមប្រភពព័ត៌មានក្រៅផ្លូវការបានបង្ហើបអោយដឹងថាជនសង្ស័យឈ្មោះសួនសារិទ្ធជាមុខសញ្ញាសេពគ្រឿងញៀនយ៉ាងសកម្មនៅក្នុងទីរួមខេត្តព្រះវិហារហើយសមត្ថកិច្ចមិនដែលចាប់បានវាម្ដងណាទ្បើយរហូតដល់ចិត្តសាហាវហ៊ានចេញប្លន់សម្លាប់មនុស្សយកម៉ូតូក្នុងករណីនេះ៕
មង្គល