ខេត្តកំពង់ឆ្នាំង៖ ការប្រកួតកីឡាបាល់ទាត់មហាជន ជ្រើសរើសជើងឯកឆ្នាំ២០១៤-២០១៥ ដែលរៀបចំឡើងដោយមន្ទីរអប់រំយុវជននិងកីឡាខេត្តកំពង់ឆ្នាំង គិតត្រឹមរសៀលថ្ងៃទី ១៨ ខែសីហា ឆ្នាំ២០១៥ នេះមានចំនួន៨ប្រកួត ដោយមានកីឡាករបាល់ទាត់ មហាជនចូលរួមចំនួន៨ក្រុម សម្រាប់ការប្រកួតមានចំនួន៥ថ្ងៃ ( ព្រឹក , ល្ងាច ) ដែលបានចាប់ដំណើរការពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០១៥ នៅទីលានបាល់ ទាត់មុខសាលាខេត្តកំពង់ឆ្នាំង។
គណៈកម្មការដឹកនាំការប្រកួតបានអោយដឹងថា៖ជាលទ្ទផល នៅថ្ងៃទី១៧ ខែសីហា ឆ្នាំ២០១៥ពេលព្រឹក ក្រុមរាហ៊ូចាប់ច័ន្ទទឹកផុស ឈ្នះ ក្រុមបរិបូរណ៏ ៥ – ១ និងក្រុមពង្រស្វាយជ្រុំឈ្នះ ស្រុករលាប្អៀរ ៥ – ៣ ។នៅរសៀលថ្ងៃដដែល ក្រុមកំពង់ត្រឡាច ឈ្នះក្រុមកំពង់ឆ្នាំង ៣ – ០ និងក្រុម Pitou FC ឈ្នះក្រុមដំរី ស FC ២ – ១។
នៅព្រឹកថ្ងៃទី១៨ ខែសីហា ក្រុមបរិបូរណ៏ឈ្នះក្រុមកំពង់ឆ្នាំង ៤ – ៣ ចំណែកក្រុម Pitou FC ឈ្នះក្រុម រលាប្អៀរ ៣ – ១ និងនៅរសៀលថ្ងៃដដែល ក្រុមកំពង់ត្រឡាច ឈ្នះក្រុមរាហ៊ូចាប់ច័ន្ទទឹកផុស ៤ – ៣ ហើយក្រុមដំរី ស FC ឈ្នះក្រុម ពង្រស្វាយជ្រុំ ១១ – ០ ។
សម្រាប់ការប្រកួតរវាងក្រុមមហាជនកំពង់ត្រឡាចជាមួយ ក្រុមរាហ៊ូចាប់ច័ន្ទទឹកផុស នៅរសៀល ថ្ងៃទី១៨ ខែសីហានេះ ប្រកួតបាន១២នាទី កីឡាករពាក់អាវលេខ១២ ឈ្មោះ សុះ គ្រីយា ក្រុមកំពង់ត្រឡាច រកបានមួយគ្រាប់អោយក្រុមខ្លួនមុន ចំណែកនៅនាទី ទី២៥ កីឡាករពាក់អាវលេខ ១១ ឈ្មោះ សា សុលី ក្រុមទឹកផុស សងសឹកបានមួយគ្រាប់វិញ ធ្វើអោយពន្ទុ ១ – ១ ។ ការប្រកួតដល់នាទី ទី៤៣ ក្រុមរាហ៊ូចាប់ច័ន្ទទឹកផុសរកបានមួយគ្រាប់ ដែលទាត់បញ្ចូលទីដោយ កីឡាករពាក់លេខ ១៧ ឈ្មោះ សុខ ជីវ័ន្ត និងនៅ នាទី ទី៤៧ (ថែមម៉ោង) កីឡាករសា សុខលី រកបានមួយគ្រាប់ទៀត ធ្វើអោយក្រុមរាហ៊ូចាប់ច័ន្ទទឹកផុសឈ្នះក្រុមកំពង់ត្រឡាច ៣ – ១ នៅក្នុងតង់ទី១ ។
ចូលដល់តង់ទី២ក្រុមកំពង់ត្រឡាចដែលមិនទាន់បាក់ទឹកចិត្ត បានសម្រុកមកលើក្រុមរាហ៊ូចាប់ច័ន្ទ ទឹកផុស រហូត ដល់នាទី ទី ៨២ ក្រុមរាហ៊ូចាប់ច័ន្ទទឹកផុស ធ្វើអោយមានកំហុសនៅជិតទី ត្រូវបានអាជ្ញាកណ្តាលពិន័យប៉េណាំងទី ដែលទាត់បញ្ជូលទីបានសម្រេចដោយកីឡាករពាក់អាវលេខ ៦ ឈ្មោះ លី ទោម៉ាន់ ។ និងចុងម៉ោងទៅហើយ គឺនៅនាទី ទី ៨៧ និងនាទី ទី៩២ កីឡាករពាក់អាវលេខ ១២ ឈ្មោះ សុះគ្រីយ៉ា រកបាន២គ្រាប់ស្ទួនគ្នា ធ្វើអោយចប់ការប្រកួត ក្រុមកីឡាករ កំពង់ត្រឡាចឈ្នះ ក្រុមរាហ៊ូចាប់ច័ន្ទទឹកផុស ៤ – ៣ ។ ក្នុងការប្រកួតក្រុមទាំង២នេះ ក្រុមក្រុមកំពង់ត្រឡាចបានទទួលកាតលឿងពីអាជ្ញាកណ្តាលចំនួន២ គឺកីឡាករឈ្មោះ ឯល ហ្គោហ្វា និងកីឡាករឈ្មោះ ម៉ាន់ អារីហ្វីន៕
