កំពង់ឆ្នាំង៖ ប្រជាពលរដ្ឋចំនួន១១០នាក់ ត្រូបានបំពេញសិទ្ធជាប្រជាការពារ នៅក្នុងឃុំកំពង់ហៅ កាលពីថ្ងៃទី២៥ ខែសីហា ឆ្នាំ២០១៥ នៅក្នុងពិធីនេះ លោក ចេង ញ៉ាន់ អភិបាលរងខេត្តកំពង់ឆ្នាំង បានដាក់គោលការអោយប្រជាការពារឃុំកំពង់ហៅ ស្រុកកំបង់លែងធ្វើការបង្ក្រាបបទល្មើសនេសាទដែលកើតមានក្នុងមូលដ្ឋានឃុំរបស់ខ្លួន ព្រោះកន្លងមកបទល្មើសទាំងនោះ បានធ្វើអោយប្រជាពលរដ្ឋមានការខកចិត្តយ៉ាងខ្លាំង នៅពេលគ្មានអ្នកណាចុះបង្ក្រាប។
លោក ចេង ញ៉ាន់ អភិបាលរងខេត្តកំពង់ឆ្នាំង បានថ្លែងនៅក្នុងពិធីនោះថា៖ប្រជាពលរដ្ឋនៅក្នុងឃុំកំពង់ហៅបានប្រាប់ឯកឧត្តមថា នៅក្នុងឃុំកើតមានករណីឆក់ត្រជាក់ ឆក់ក្តៅ និងការរុញជន ដែលមានដាក់ឧបករណ៍ឆក់ ធ្វើអោយវិនាសហិនហោចដល់មច្ឆាជាតិគ្រប់ប្រ ភេទនៅក្នុងឃុំ ដោយប្រជាពលរដ្ឋស្នើសុំអោយអាជ្ញាធរខេត្ត ជួយដោះស្រាយជូនពួកគាត់ផង ព្រោះជនល្មើសទាំងនោះ បានមកពីភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង។
លោកបន្តថា៖ប្រជាការពារទាំង១១០នាក់បង្កើតឡើង និងបំពេញសិទ្ធក្នុងថ្ងៃនេះ ត្រូវដើរតួជាប្រជាពលរដ្ឋល្អនិងគំរូ កុំប្រព្រឹត្តបទល្មើសនេសាទ ត្រូវធ្វើការព័ទ្ធចាប់ជនល្មើសដែលមកប្រព្រឹត្តបទល្មើសនេសាទនៅក្នុងមូលដ្ឋានខ្លួន បើសិនជាបង្ក្រាបមិនបានត្រូវរាយការណ៍ជូនលោក នឹងបញ្ជូនកំលាំងនគរបាល ឬកម្លាំងកងរាជអាវុធហត្ថខេត្ត មកជួយអន្តរាគមភ្លាមៗទោះបីយប់ឬថ្ងៃក៍ដោយ ត្រូវតែចាប់ជនល្មើសទាំងនោះអោយបានចាត់ការតាមច្បាប់។
ដោយឡែកក្រុមប្រជាការពារឃុំកំពង់ហៅបានប្រាប់ថា៖ ក្រុមជនល្មើសដែលមកពីក្រុងកំពង់ឆ្នាំង មិនដែលខ្លាចសមត្ថកិច្ចជំនាញឬអាជ្ញាធរមូលដ្ឋាននោះទេ មិនដឹងថាពួកគេអាងអីទើបពួកគេហ៊ានបែបនេះ ប្រសិនបើហ៊ានចាប់ពួកជនល្មើសនឹងតដៃវិញ គឺបើកកាណូតដេញបុកពន្លិចឬក៍វាយបក ព្រោះនៅក្នុងកាណូតរបស់ពួកគេមានសុទ្ធតែដំបងឬស្សីទុកការពារខ្លួន។
ទាក់ទងនឹងបញ្ហាបទល្មើសខាងលើនេះលោក សោម ភិរុណ នាយខ័ណ្ឌរដ្ឋបាលជលផលកំពង់ឆ្នាំងបានអោយដឹងថា៖ប្រសិនបើមានករណីបទល្មើសបែបនេះ នៅក្នុងមូលដ្ឋានប្រ ជាការពារមានសិទ្ធិចាប់បញ្ជូនជនល្មើស និងវត្ថុតាងមករដ្ឋបាលជលផល ដើម្បីកសាងសំណុំរឿងតាមនីតិវិធីបញ្ជូនទៅតុលាការខេត្ត។ម្យ៉ាងវិញទៀតទាំងប្រជាពលរដ្ឋ និងប្រជាការ ពារ ក៍សូមសហការផ្តល់ព័ត៌មានច្បាស់លាស់ដល់សមត្ថកិច្ចជំនាញ ឬសមត្ថកិច្ចពាក់ព័ន្ធនៅទីនោះ ជួយចាប់ឃាត់ជនល្មើសទុក។ការបង្ក្រាបបទល្មើសនេសាទ ក៍ដូចជាបទល្មើសកាប់បំផ្លាញ ឈូសទន្ទ្រានព្រៃលិចទឹកយកដីធ្វើចំការ គឺទាល់តែមានការចូលរួមពីប្រជាពលរដ្ឋ ប្រជាការពារ សមត្ថកិច្ចពាក់ព័ន្ធ ជាពិសេសគឺអាជ្ញាធរមូលដ្ឋាន ទើបការបង្ក្រាបបទល្មើសទាំងនោះមានប្រសិទ្ធិភាព និងអាចការពារធនធានមច្ឆាជាតិអោយគង់វង្សបានល្អទៅអនាគត៕