ខេត្តប៉ៃលិន៖ ស្ត្រីម្នាក់ដែលគេស្គាល់ថាជាប្រពន្ធថៅកែកាស៊ីណូម្គុដពេជ្រ បានបញ្ជាឲ្យសន្តិសុខរបស់ខ្លួនចាប់អ្នកយកព័ត៌មាន ខណៈពេលអ្នកយកព័ត៌មានទាំងនោះចុះទៅផ្តិតយករូបភាព ពួកបុគ្គលិកកាស៊ីណូហ្កាទ្បាក់ស៊ីហ្គោលហូថែល (Galaxy Gold Hotel)លើកគ្នាតាវ៉ា
នៅមុខកាស៊ីណូ ក្នុងរឿងកាត់ប្រាក់ខែរបស់បុគ្គលិក ។ ដែលហេតុការណ៏នេះ បានកើតឡើងកាលពីវេលាម៉ោង៩និង០០នាទីយប់ថ្ងៃទី២ ខែមករា ឆ្នាំ២០១៦ កន្លងទៅ ស្ថិតនៅជាប់ផ្លូវជាតិលេខ៥៧ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
តាមប្រភពព័ត៌មានពីបុគ្គលិកកាស៊ីណូហ្កាឡាកស៊ីហ្កោហូថែល ដែលនាំគ្នាតវ៉ា បានឲ្យកម្ពុជាថ្មីដឹងថា៖ ពួកគាត់នាំគ្នាតវ៉ានេះគឺចងឲ្យម្ចាស់កាស៊ីណូហ្កាឡាក់ស៊ីហ្កោហូថែល គោរពនូវលក្ខខណ្ទការងារ និងគោលការណ៍ច្បាប់ បើកប្រាក់ខែឲ្យពួកគេ ដោយមិនត្រួវកាត់ប្រាក់ខែដូច្នោះទេ ។ ប្រភពព័ត៌មានបន្តថា៖ នៅក្នុងកិច្ចសន្យាការងារ គឺពួកគេបានទទួលប្រាក់បៀរវត្តន៏៨ពាន់បាត់(ប្រាក់ថៃ) ដោយធ្វើការរយៈពេល៨ម៉ោង តែក្រោយមកបែរជាថៅកែបញ្ចុះតំលៃមកត្រឹម៧ពាន់បាត ។ ប្រភពព័ត៌មានបន្តឲ្យដឹងថា៖ ក្រោយមកដោយចង់ដឹងថាចំនួនប្រាក់ខែពួកគេ បាននាំគ្នាទៅមើលក្តាព័ត៌មានដែលរដ្ឋបាលបិទផ្សាយនៅមុខកាស៊ីណូ ស្រាប់តែគេសរសេរត្រឹមតែ៥ពាន់បាតប៉ុណ្ណោះក្នុង១ខែ ហើយពួកគេត្រួវធ្វើការរហូតដល់១០ម៉ោងក្នុង១ថ្ងៃ ដោយឃើញដូច្នោះទើបកើតទុក្ខមិនសុខចិត្ត ក៏លើកគ្នាតវ៉ាតែម្តង ។ប្រភពព័ត៌មានបានឲ្យដឹងទៀតថា៖ ក្នុងហេតុការណ៏បុគ្គលិកផ្ទុះការតវ៉ានេះ មានភ្នាក់ងារយកព័ត៌មានឲ្យកាសែត និងទូរទស្សន៏ ជាច្រើននាក់ ចុះទៅយកព័ត៌មាន ស្រាប់តែមានថៅកែស្រីម្នាក់ដែលគេស្កាល់ថាជាប្រពន្ធថៅកែកាស៊ីណូម្គុដពេជ្រ បានបញ្ជាឲ្យសន្តិសុខកាស៊ីណូដែលស្ថិតក្នុងស្ថានភាពស្រវឹងផង ចេញមករករឿងចាប់ក្របួចកអាវបញ្ជាឱ្យអ្នកយកព័ត៌មានលុបរូបភាពចេញ ដើម្បីបំបិទភាស្តុតាង ព្រមទាំងគំរាមពួកអ្នកយកព័ត៌មានទាំងនោះផងដែរ ។
តាមប្រភពព័ត៌មានពីភ្នាក់ងារយកព័ត៌មានខាងលើ បានឱ្យដឹងថា៖ នៅពេលពួកគេឃើញក្រុមបុគ្គលិកកាស៊ីណូនាំគ្នាតវ៉ានៅមុខកាស៊ីណូបែបនេះ ទើបទៅឈរថតនៅក្បែរចិញ្ចើមផ្លូវសាធារណៈ ដោយមិនបានចូលទៅថតនៅក្នុងកាស៊ីណូទ្បើយ ។ ស្របពេលកើតហេតុការណ៏នោះ ក្រុមអ្នកយកព័ត៌មានបានទាក់ទងទៅលោកស្នងការនគរបាលខេត្តប៉ៃលិន ជាច្រើនលើកច្រើនសា ដើម្បីឱ្យជួយអន្តរាគមន៍ តែអត់មានអ្នកលើកទូរស័ព្ទ ហើយគ្មានសមត្ថកិច្ចណាម្នាក់ហ៊ានចេញមុខទ្បើយ ,ក្រោយមកទើបពួកគេទាក់ទងទៅលោកអភិបាលខេត្ត ដើម្បីឲ្យជួយអន្តរាគមន៍ ។ ក្រោយពីកើតហេតុ ទើបគេឃើញសមត្ថកិច្ចចេញទៅអើតមើលបន្តិច ក៏នាំគ្នាត្រទ្បប់ទៅផ្ទះវិញយ៉ាងស្ងៀមស្ងាត់ ។
ទាក់ទងបញ្ហាខាងលើ អ្នកព័ត៌មានកម្ពុជាថ្មី មិនអាចទំនាក់ទំនងតាមទូរស័ព្ទទៅលោក ឈិន សុភ័ណ នាយករដ្ឋបាលកាស៊ីណូហ្កាឡាក់ស៊ីហ្កោហូថែល បាននៅព្រឹកថ្ងៃទី៤ ខែមករា ឆ្នាំ២០១៦ នេះ ដោយទូរសព្ទមិនចូល ៕
