!
រាជធានីភ្នំពេញៈ រសៀលថ្ងៃទី២៦មករា២០១៦នេះ លោកប៉ា សុជាតិវង្សអភិបាលរាជធានីភ្នំពេញ អមដោយមន្ត្រីជំនាញក្រោមឱវាតសាលារាជធានី បានអញ្ជើញចុះទៅពិនិត្យសំណង់ការដ្ឋានស្ថាបនាស្ថានីយ៍បូមទឹកទួលគោកទី២ កំពុងសាងសង់បានប្រមាណ៣០% និងប្រឡាយបាក់ទូក កំពុងដំណើរការស្តារឡើងវិញ ។
មន្ត្រីមសាលារាជធានីភ្នំពេញបានឲ្យដឹងថា ពេលនេះ ការដ្ឋានស្ថាបនាស្ថានីយ៍បូមទឹកទួលគោកទី២ បានដំណេីរការចាក់បេតុងកម្រាលក្រោមតួស្ថានីយ៍ បណ្តោយ ១៧.៥ម ទទឹង ១៣.៥ម កម្រាស់ ០.៥ម បរិមាណបេតុង ១២០មែ៉ត្រគូប លទ្ធផលជារួមបានប្រមាណ៣០%ហើយ និងគ្រោងបញ្ចប់នៅអំឡុងខែឧសភា២០១៦នេះ ។
មន្ត្រីដដែលបានបញ្ជាក់ថា ស្ថានីយ៏បូមទឹកទួលគោកទី២នេះ ត្រូវបំពាក់ម៉ូទ័របូមទឹកចំនួន៥គ្រឿង ដែលមានសមត្ថភាពបូម៥ម៉ែត្រគូបក្នុង១វិនាទី ។ ចំណែកប្រឡាយ បាក់ទូកកំពុងស្ថាបនា ចាប់ពីផ្លូវទំនប់៧០ ដល់ផ្លូវបូរីទួលសង្កែ ប្រវែង២៩០០ម៉ែត្រ ទទឹងពី៨ទៅ៥០ម៉ែត្រ បន្ទាប់ពីស្ថាបនារួចប្រពន្ធ័ទាំងពីរខាងលើនេះ អាចរំដោះទឹកចេញពីតំបន់ទួលគោក តំបន់ស្រះចក ដូនពេញ និងតំបន់ទួលសង្កែ ឬអាចនិយាយបានថា អាចរំដោះទឹកពីភាគខាងជើងរាជធានីភ្នំពេញតែម្តង ៕