សៀមរាប៖លោកពៅប៊ុនធឿន អភិបាលស្រុកជីក្រែងបានសង្កត់ធ្ងន់ទៅលើអ្នកសារព័ត៌មាន ដែលបានថត សកម្មភាពដឹកឈើដោយខុសច្បាប់របស់ប្រជាពលរដ្ឋ ហើយបានបញ្ជាក់ថា អ្នកនៅស្រុកលើបើមិនអោយកាប់ឈើឲ្យទៅរកអី ចំណែកអ្នកនៅផ្នែកខាងក្រោមបើក្រៅពីធ្វើស្រែមានតែរកត្រី ដូច្នេះយើងកុំខ្លាចចង់ផ្សាយអីក៏ផ្សាយទៅ ថតអីក៏ថតទៅ យើងកុំខ្លាចតែបើខ្លាំងខ្លាពេក ជម្រុញឲ្យរាស្ត្រប្តឹងតែម្តង ប្រសាសន៍នេះ ត្រូវបានលើកឡើងក្នុង ពិធីប្រជុំប្រកាសសមាភាពគណៈបញ្ជាការឯកភាព ឃុំ ខ្វាវ ថ្ងៃទី ២៦មករា ឆ្នាំ ២០១៦។
ក្នុងឳកាសនៃពិធីប្រកាសសមាសភាពគណៈបញ្ជាការឯកភាពឃុំខ្វាវ លោក ពៅ ប៊ុនធឿនអភិបាលនៃគណះអភិបាលស្រុកជីក្រែង បានសង្កត់ធ្ងន់ទៅលើ អង្គការមួយចំនួនដែលតែងតែធ្វើសកម្មភាពទារលុយកាក់ ពីបទល្មើស ហើយបានចោទប្រកាន់មកលើអ្នកសារព័ត៌មាន ថាអ្នកសារព័ត៌មាន ដើរតែតាមថតសកម្មភាពអ្នករកស៊ីដឹកឈើ ដោយខុសច្បាប់ ហើយអ្នកខ្លះទារលុយទារកាក់ច្រើន ពីការដឹកបទល្មើស ក្នុងនោះលោកបានបញ្ជាក់ថា បើសកម្មភាពនេះមានភាពខ្លាំងក្លាយើងនឹងឲ្យរាស្ត្រធ្វើពាក្សបណ្តឹងទៅតុលាការដើម្បីចាត់ការទៅតាមនិតិវិធីច្បាប់ ព្រោះការងារព្រៃឈើមិនម៉ែនជាតួនាទីរបស់អ្នកពត៌មានទេ ជាតួនាទីរបស់រដ្ឋបាលព្រៃឈើនឹងបរិស្ថាន ដែលត្រូវដឹងថា កន្លែងណាត្រូវទប់ស្កាត់ កន្លែងណាដែលត្រូវឲ្យរាស្ត្ររក។
ក្នុងនោះលោក ពៅ ប៊ុនធឿន អភិបាលស្រុក បានលើកឡើងពីអនុសាសន៏របស់រាជរដ្ឋាភិបាល មន្ត្រីទាំងអស់ត្រូវតែមុចទឹក ដុះក្អែល ឆ្លុះកញ្ចក់ សិតសក់ឲ្យបានស្អាត បើមិនទាន់ស្អាតទេត្រូវធ្វើយ៉ាងម៉េច ពិសេសអស់លោកមេភូមិគ្រប់ភូមិត្រូវតែបំរើប្រជាពលរដ្ឋរបស់ខ្លួនឲ្យបានល្អ ជួយដោះស្រាយទុក្ខលំបាករបស់ប្រជាពលរដ្ឋ។
សូមបញ្ជាក់ថា ឃុំខ្វាវ គឺជាប្រភពបទល្មើសដែលកំពុងតែធ្វើសកម្មភាព យ៉ាងអាណាធិបតេយ្យ ដឹកជញ្ជូនទាំងយប់ទាំងថ្ងៃដោយគ្មានច្បាប់ទំលាប់ តែពុំដែលឃើញមានសមត្ថកិច្ចមេព្រៃ ឬសមត្ថកិច្ចពាក់ព័ន្ឋមាន វិធានការបង្ក្រាបនោះទេ តែនៅពេលអ្នកសារព័ត៌មាន ថតផ្សាយបែរជាលោក អភិបាលស្រុកមានប្រតិកម្ម ក្នុងគោលបំណងគាំទ្រឲ្យមានការកាប់បំផ្លាញព្រៃឈើ។
ដោយ ប៊ុន រដ្ឋា