ខេត្តកំពង់ឆ្នាំង៖ មន្ត្រីការិយាល័យផលិតកម្មនិងបសុព្យាបាលខេត្ត នៅព្រឹកថ្ងៃទី០៥ ខែកុម្ភ ឆ្នាំ២០១៦ បានបើកយុទ្ធនាការចុះបាញ់ថ្នាំជីវសុវត្តិភាពដើម្បីទប់ស្កាត់ជម្ងឺបក្សី ដែលអាចឆ្លងពីបក្សីមកមនុស្ស ហើយការបាញ់ថ្នាំនេះបានធ្វើឡើងនៅក្នុងទីសត្តឃាតក្រុង តាមផ្សារលើ ផ្សារក្រោម និងនៅកណ្តាលទីក្នុងស្រុកកំពង់ត្រឡាច។
លោក ក្រឹង សំអាត ប្រធានការិយាល័យផលិតកម្មនិងបសុព្យាបាលខេត្ត ជាអ្នកដឹកនាំ
យុទ្ធការខាងលើនោះបានអោយដឹងថា៖ អនុវត្តតាមតួនាទីភារកិច្ច និងការណែនាំរបស់ក្រសួង
កសិកម្ម ជារៀងរាល់២ខែម្តងមន្ត្រីបសុព្យាបាលខេត្តតែងចុះបាញ់ថ្នាំជីវសុវត្តិភាពចល័តនៅតាម
ទីសត្តឃាត និងកន្លែងចិញ្ចឹមមាន់ទា ក្រុង ស្រុកជាបន្តបន្ទាប់ដើម្បីទប់ស្កាត់ជម្ងឺបក្សី។
ដោយឡែកនៅព្រឹកថ្ងៃទី៥ ខែកុម្ភះ ឆ្នាំ២០១៦ មន្ត្រីបសុពេទ្យខេត្តមួយក្រុមមានគ្នាជាង១០នាក់បានចុះយុទ្ធនាការបាញ់ថ្នាំជីវសុវត្តិភាពតាមទីកន្លែងមួយចំនួនមាន ទីសត្តឃាតក្រុងកំពង់ឆ្នាំង តាមកន្លែងលក់មាន់ទាលើចញ្ចើមផ្លូវក្នុងក្រុង តាមចញ្ចើមផ្លូវផ្សារក្រោម និងតាមកន្លែងលក់ដូរស៊ុតមាន់ទាក្នុងផ្សារក្រោមនិងផ្សារលើ។ នៅតាមកន្លែងលក់ដូរមាន់ទាខាងលើនេះមន្ត្រីបសុពេទ្យខេត្ត កបានចែកនូវស្រោមដៃនិងម៉ាស់ការពារដល់បងប្អូនអជីវករលក់ដូរទាំងអស់ផងដែរដើម្បីបង្កាទប់ស្កាត់ជម្ងឺបក្សីពីសត្វមាន់ទាដល់មនុស្ស។
លោក ក្រឹង សំអាត បានបញ្ជាក់អោយដឹងទៀតថា៖ការពាក់ស្រោមដៃនិងម៉ាស់បិតមាត់លក់ដូរមាន់ទា គឺពិតជាអាចទប់ស្កាត់ការរាលដាលជម្ងឺពីបក្សីមកមនុស្សបានយ៉ាងមានប្រសិត
ភាព។ដោយឡែកការបាញ់ថ្នាំជីវសុវត្តិភាពតាមទីតាំងខាងលើគឺអាចសំលាប់មេរោគដែលឆ្លងពីបក្សីទៅបក្សីមួយទៀតបាន ជាពិសេសក៍អាចការពារសុខភាពសត្វសំរាប់ជាចំណីអាហាររបស់មនុស្សផងដែរ។
ចំណែកនៅឯកណ្តាលទីស្ថិតនៅក្នុងស្រុកកំពង់ត្រឡាចភ្នាក់ងារបសុពេទ្យខេត្តក៍បានធ្វើការចុះបាញ់ថ្នាំជីវសុវត្តភាពដល់រថយន្តដឹកសត្វឆ្លងកាត់ខេត្តផងដែរ ដើម្បីសំលាប់មេរោគតាមការដឹកជញ្ជូនសត្វពីជនបទចូលទីក្រុង ដែលនៅមុនពេលចូលឆ្នាំចិនយើងនេះគេពិនិត្យឃើញបងប្អូនប្រជាពលរដ្ឋយើងបានសំរុកដឹកសត្វមាន់ទាជ្រូកជាច្រើនចូលក្នុងទីក្រុងភ្នំពេញ។
លោកប្រធានការិយាល័យផលិតកម្មនិងបសុព្យាបាលខេត្ត ក៍សូមសំណូមពរផងដែរដល់អាជីវករពិឃាតសត្វនិងលក់សាច់សត្វគ្រប់ប្រភេទចូលរួមសហការណ៍ធ្វើអនាម័យវិចខ្ចប់និងលក់ដូរសាច់សត្វអោយមានអនាម័យល្អដើម្បីសុខភាពប្រជាពលរដ្ឋ។បើនៅកន្លែងណាមានសត្វមាន់ទាជ្រូកឈឺត្រូវរាយការណ៍ជាបន្ទាន់មកការិយាល័យបសុពេទ្យខេត្តដើម្បីមន្ត្រីជំនាញចុះបាញ់ថ្នាំទប់ស្កាត់ជម្ងឺសត្វអោយបានទាន់ពេលវេលា៕
