កំពង់ធំៈ ឯកឧត្តម ឧត្តមសេនីយ័ត្រី សោម ស៊ុន ប្រធានសមាគមន៍អតីតយុទ្ធជនកម្ពុជា ខេត្តកំពង់ធំ ព្រមទាំង មន្ត្រីក្រោមឳវាទ បានចុះសួរសុខទុក្ខ លោក សំ ផាង ដែលជាជនពិការ អតីតយុទ្ធជន និងធ្លាប់ជា បំរើការនៅអង្គភាព តំបន់ប្រតិបត្តិការសឹករងកំពង់ធំ និងបានទទួលរងគ្រោះថ្នាក់ ហើយបានដាច់ដៃទាំងសងខាងក្នុងសម័យបើកផ្លូវជាតិ៦២ ដែលលាតសន្ធឹងពីខេត្តកំពង់ធំ ទៅខេត្តព្រះវិហារ។
នៅព្រឹកថ្ងៃទី១៧ ខែកុម្ភះ ឆ្នាំ២០១៦ ឯកឧត្តម ឧត្តមសេនីយ៍ត្រី សោម ស៊ុន បាននាំយកអំណោយទៅប្រគល់ជូន ឈ្មោះ សំ ផាង រស់នៅភូមិប្រាសាទ ឃុំប្រាសាទ ស្រុកសន្ទុក ខេត្តកំពង់ធំ ដែលអតីតយុទ្ធជន ពិការដៃទាំងសងខាងក្នុងការដោះមីបើកផ្លូវជាតិលេខ៦២ដែលពួកអតីតខ្មែរក្រហមបង្កប់តាមដងផ្លូវមិនឲ្យមានចរាចរបានពីខេត្តកំពង់ធំទៅខេត្តព្រះវិហារ ក្នុងឳកាសនៃការចុះសួរសុខទុក្ខ ឯកឧត្តម សោម ស៊ុន បាននាំយកនូវរបស់កំដរដៃមានដូចជា អង្ករ៥០ គីឡូក្រាម មីយើង០១កេស ទឹកត្រី០១យួរ ទឹកស៊ីអ៊ីវ ០១យួរ ទឹកត្រីមួយយួរ ជូនដល់ក្រុម គ្រួសារលោក សំ ផាង ដែលជាជនពិការ ក្នុងនោះដែរក៏បានជូនក្មួយដែលត្រូវជាកូនរបស់លោក សំ ផាង មានកាបូបចំនួន៣ សៀវភៅ២០០ទំព័រ ៣០ក្បាល និងប៉ិច៣០ដើម សម្រាប់ការជួយរំលែកការចំណាយ របស់ក្រុមគ្រួសារជនពិការនេះផងដែរ។
ក្នុងឳកាសនោះ ឯកឧត្តម ឧត្តមសេនីយ៍ត្រី សោម ស៊ុន បានផ្តាំផ្ញើរដល់លោក សំ ផាង និងភរិយា ថែរក្សា សុខភាព តស៊ូជីវិត ជម្រុញឲ្យកូនចៅបានចូលរៀនសូត្រគ្រប់គ្នា ចៀសវាងការខកខានដោយមិនបានចូលរៀន ដើម្បីឲ្យក្លាយជាមនុស្សល្អ ជាថ្នាក់ដឹកនាំល្អ សម្រាប់បំរើប្រទេសជាតិមាតុភូមិទៅអនាគត់ ។
ដោយ ប៊ុន រដ្ឋា
