ខេត្តកណ្តាល៖ មានការភ្ញាក់ផ្អើលមួយ បង្កជាជម្លោះ រវាងក្មេងស្ទាវ និងសិស្សសាលាពីរក្រុម ធ្វើឱ្យបងប្អូនប្រជាពលរដ្ឋរស់នៅក្បែរនោះ ចោមរោមមើលយ៉ាងច្រើនកុះករ តាំងពីថ្ងៃទី ៦ ខែកុម្ភៈ ឆ្នាំ២០១៦ នៅចំណុចហាងយីហោ ក្លឹបសប្បាយរីករាយ ស្ថិតក្នុងភូមិព្រែករុន ឃុំព្រែកគយ ស្រុកស្អាង ខេត្តកណ្តាល ។
មិនតែប៉ុណ្ណោះទឹកដីមូលដ្ឋានស្រុកស្អាងកំពុងតែបង្កើតក្លឹបសប្បាយជាច្រើនកន្លែង ពង្វក់កូនសិស្សទាំងប្រុសស្រីចូលកំសានភ្លេចរៀនសូត្រ ជាក់ស្តែងដូចជានៅភូមិសិត្បូរ ឃុំសិត្បូរ ជាដើម ។
ប្រជាពលរដ្ឋបានលើកឡើងថា ថៅកែហាងសប្បាយរីករាយ មានឈ្មោះ ហ៊ោ រ៉ា ហើយគេដឹងថា មនុស្សរូបនេះ ជាថៅកែកាប់គោនៅតំបន់នោះទៀតផង ម្យ៉ាងវិញទៀតពួកគាត់តែងតែឆ្ងល់ថា ហេតុអ្វីបានអាជ្ញាធរចេះតែអនុញ្ញាតបើកច្បាប់ ឱ្យមានក្លឹបកំសាន្តជាអនាធិបតេយ្យបែបនេះ ធ្វើឱ្យពួកគាត់ទទួលទានដំណេកមិនបាន លាក់លឺសូរទ្រហឹងរាល់ពេលរាត្រី ប្រសិនបើមានចាស់ជរាមានជម្ងឺវិញលឺសម្លេងស្ទើរតែមិនរស់ថែមទៀតផង ។ យោងតាមប្រភពនេះ លោក សេង សុជាតិ អធិការប៉ូលិសស្រុកស្អាង បានបង្វែរឿងទាំងអស់ឱ្យអ្នកយកព័ត៌មានទៅសួរលោក ខឹម ច័ន្ទគិរី អភិបាលស្រុកស្អាងទៅវិញ ។
ពាក់ព័ន្ធនឹងករណីខាងលើលោក ហ៊ោ រ៉ា ថៅកែហាងក្លឹបសប្បាយរីករាយបានទំនាក់ទំនងជាមួយអ្នកយកព័ត៌មានយើង តាមរយៈទូរស័ព្ទថា ក្លឹបរបស់គេបើកមានច្បាប់ពីអាជ្ញាធរត្រឹមត្រូវប៉ុន្តែមិនបានបង្ហាញនូវលិខិតស្នាមណាមួយឱ្យអ្នកយកព័ត៌មានឃើញនោះទេ ព្រមទាំងព្រមានដល់អ្នកយកព័ត៌មានដែលកំពុងសាកសួរក្នុងផ្លូវល្អជុំវិញបញ្ហាខាងលើនេះ មិនតែប៉ុណ្ណោះ លោក ហ៊ោ រ៉ា បញ្ចេញសម្លេងតាមទូរស័ព្ទអមដោយពាក្យអសុរោះ និងព្រមានដល់អ្នកយកព័ត៌មានថែមទៀតផង ។
គួរបញ្ជាក់ផងដែរថា បន្ទាប់ពីមានការបិទក្លឹបទាំងឡាយនៅក្រុងតាខ្មៅ គេឃើញមានក្លឹបយ៉ាងច្រើន រីកដុះដាលនៅស្រុកស្អាងទៅវិញ ។ ជុំវិញបញ្ហាទាំងអស់ អ្នកយកព័ត៌មានយើងមិនអាចសុំការបំភ្លឺពីលោកអភិបាលស្រុកស្អាង បានឡើយ ៕ 
