ស្ទឹងត្រែង៖ប្រជាការពារភូមិបានសហការជា មួយកម្លាំងនគរបាលប៉ុស្ត៍សង្កាត់សាមគ្គីចុះឃាត់ខ្លួនជនសង្ស័យលួចកាប់ក្របីប្រជាពលរដ្ឋបានម្នាក់ ជាមួយសាច់ក្របីចំនួន៤បេនិងម៉ូតូមួយគ្រឿងជាមធ្យាបាយសំរាប់ធ្វើសកម្មភាពបំរើអោយបទល្មើស។
ជនសង្ស័យលួចកាប់ក្របីប្រជាពលរដ្ឋ ត្រូវបានប្រជាការពារសហការជាមួយនគរបាលប៉ុស្ត៍សង្កាត់សាមគ្គីចុះឃាត់ខ្លួនកាលពីវេលាម៉ោង៥និង៤៥នាទីព្រឹកថ្ងៃទី១៩ខែកុម្ភៈឆ្នាំ២០១៦នៅចំណុចក្នុងព្រៃមួយកន្លែង ស្ថិតក្នុងភូមិកំផាន់ សង្កាត់សាមគ្គី ក្រុង ខេត្តស្ទឹងត្រែង។
សមត្ថកិច្ចបានអោយដឹងថាជនសង្ស័យដែលសមត្ថកិច្ចចាប់ឃាត់ខ្លួនពាក់ព័ន្ធនិងការលួចកាប់ក្របីប្រជាពលរដ្ឋ មានឈ្មោះដោក វិចិត្រ ភេទប្រុស អាយុ២៤ឆ្នាំ និងមានទីលំនៅភូមិព្រែកសង្កាត់ ក្រុង ខេត្តស្ទឹងត្រែង។
សមត្ថកិច្ចបានបន្តអោយដឹងទៀតថាជនសង្ស័យត្រូវបានប្រជាការពារភូមិប្រទះឃើញកំពុងធ្វើសកម្មភាព កាប់ក្របីដាក់ចូលបេនិងត្រៀមដឹកចេញទៅ ក៏ត្រូវបានប្រជាការពាររាយការណ៍ ទៅនគរប៉ុស្ត៍សង្កាត់សាមគ្គី សហការធ្វើការឃាត់ខ្លួនតែម្តង។
លោកបន្តថាក្នុងការឃាត់ខ្លួនជនសង្ស័យខាងលើសមត្ថកិច្ចបានធ្វើការដកហូតវត្ថុតាងសាច់ក្របីចំនួន៤បេ ម៉ូតូម៉ាកហុងដា C125 ពណិ៍ខ្មៅមួយគ្រឿងស៊េរីឆ្នាំ២០១១ ពាក់ស្លាកលេខស្ទឹងត្រែង 1A3959 និងបានខ្លួនមកកាន់អធិការដ្ឋាននគរបាលក្រុងស្ទឹងត្រែង។
បច្ចុប្បន្នជនសង្ស័យពាក់ព័ន្ធការលួចកាប់ក្របីប្រជាពលរដ្ឋកំពុងស្ថិតក្រោមការសាកសួរពីសមត្ថកិច្ចអធិការដ្ឋានក្រុង ដើម្បីចាត់ការបន្តតាមនីតិវិធីច្បាប់៕