ភ្នំពេញៈ សមត្ថកិច្ចប៉ុស្តិ៍ផ្សារដេប៉ូ៣ បានធ្វើការឃាត់ខ្លួនយុវជនបែកថ្នាំម្នាក់ ដែលរើសដុំថ្មគប់រថយន្ត ម៉ូតូ និងអ្នកធ្វើដំណើរតាមដងផ្លូវ ហើយនៅពេលសមត្ថកិច្ច ចុះទៅឃាត់ថែមទាំងវាយសមត្ថកិច្ច បណ្តាលអោយខៀវភ្នែកទៀត ។ ហេតុការណ៍នេះបានកើតឡើង កាលពីវេលាម៉ោង ៧នឹង១០នាទី តាមបណ្តោយផ្លូវកម្ពុជាក្រោម ស្ថិតក្នុងសង្កាត់ផ្សារដេប៉ូទី៣ ខណ្ឌទួលគោក។
បើតាមប្រភពពត៌មាន ពីកន្លែងកើតហេតុ បានអោយដឹងថា នៅមុនពេលកើតហេតុ គេបានឃើញយុវជនខាងលើ ទំនងជាបែកថ្នាំ បានដើរស្រែឡូឡារ តាមបណ្តោយផ្លូវកម្ពុជាក្រោម និងបានរើសដុំថ្មគប់មកលើរថយន្ត ម៉ូតូ និងអ្នកដំណើរតាមដងផ្លូវបង្កការភ្ញាក់ ហើយប្រជាពលរដ្ឋបានទំនាក់ទំនងទៅសមត្ថកិច្ចអោយចុះមកអន្តរាគមន៍។
ប្រភពដដែលបានបន្តថា បន្ទាប់ពីសមត្ថកិច្ចមូលដ្ឋាន បានមកដល់កន្លែងដើម្បីធ្វើការឃាត់យុវជនបែកថ្នាំខាងលើ បែរជាត្រូវយុវជនបែកថ្នាំនោះ មកវាយសមត្ថកិច្ចវិញ បណ្តាលអោយសមត្ថកិច្ចម្នាក់ខៀវភ្នែក រួចក៏បង្ខំចិត្តចាប់វាយខ្នោះ ដឹកតាមរ៉ឺម៉ក់ម៉ូតូកង់បី យកទៅឃុំខ្លួនបណ្តោះអាសន្ន នៅបុស្តិ៍នគរបាលរដ្ឋបាលផ្សារដេប៉ូ៣ រង់ចាំទំនាក់ទំនងទៅក្រុមគ្រួសារ នៅពេលក្រោយ ៕