ខេត្តកណ្តាល៖ ករណីគ្រោះថ្នាក់ចរាចរណ៍មួយបានកើតឡើងនៅលើកំណាត់ផ្លូវជាតិលេខ២១បេ រវាងម៉ូតូមួយគ្រឿងម៉ាកហុងដាFTRបើកបុកជាមួយរថយន្តទួរីស១២កៅអី កាលពីវេលាម៉ោង២៣ និង៥០នាទី ថ្ងៃទី១៩ ខែឧសភា ឆ្នាំ២០១៤ ចំណុចម្តុំផ្ទះលក់គ្រឿងសំណង់យីហោព្រុំ ភារម្យ ស្ថិតក្នុងភូមិព្រែកសំរោស៣ សង្កាត់តាខ្មៅ ក្រុងតាខ្មៅ បណ្តាលឲ្យបុរសម្នាក់ជាអ្នកបើកបរម៉ូតូបានស្លាប់ពេលបញ្ជូនយកទៅសង្គ្រោះនៅមន្ទីរពេទ្យ និងបុរស២នាក់ទៀតជាអ្នករួមដំណើរជាមួយបានរងរបួសយ៉ងធ្ងន់ធ្ងរ។
មន្ត្រីនគរបាលចរាចរណ៍ក្រុងតាខ្មៅបានឲ្យដឹងថា ជនរងគ្រោះដែលស្លាប់បាត់បង់ជីវិតពេលបញ្ចូនទៅមន្ទីរពេទ្យនោះមានឈ្មោះ សែម ចាន់ធា ភេទប្រុស អាយុ២២ឆ្នាំ មានទីលំនៅក្នុងភូមិព្រែអំបិល ឃុំព្រែកអំបិល ស្រុកស្អាង ខេត្តកណ្តាល ជាអ្នកបើកបរម៉ូតូ និងអ្នករួមដំណើរជាមួយ២នាក់ដែលរងរបួសធ្ងន់នោះមានឈ្មោះ ខា ឈីត ភេទប្រុស អាយុ២២ឆ្នាំ និងឈ្មោះ ឃ្លឿន ហុង ភេទប្រុស អាយុ២២ឆ្នាំ ជនរងគ្រោះទាំង២នាក់មានទីលំនៅក្នុងភូមិព្រែកហ៊ីង ឃុំព្រែកស្តី ស្រុកកោះធំ ខេត្តកណ្តាល ។
ជនរងគ្រោះទាំង៣នាក់បានជិះម៉ូតូមួយគ្រឿងម៉ាកហុងដាFTR ពណ៌ខ្មៅ គ្មានស្លាកលេខ ឌុបគ្នាយ៉ាងលឿនតាមបណ្តោយផ្លូវជាតិលេខ២១បេ ក្នុងទិសដៅពីត្បូងទៅជើង(ពីស្រុកស្អាងទៅក្រុងតាខ្មៅ) ខណៈបើកមកដល់ចំនុចកើតហេតុពុំដឹងជាមានរឿងអ្វីនោះទេម៉ូតូក៍បានរេចង្កូតទៅខាងឆ្វេងដៃផុតគំនូសពុះចែកទ្រូងផ្លូវបុកជាមួយរថយន្តម៉ាកសាំយ៉ុង១២កៅអី ពណ៌ស្លែ ពាក់ស្លាកលេខភ្នំពេញ២K-៤៤៩០ បើកបរដោយជនមិនស្គាល់អត្តសញ្ញាណក្រោយពីកើតហេតុបានចុះពីលើរថយន្តគេចខ្លួនបាត់ ។
ក្រោយពីមានហេតុការណ៍កើតឡើងជនរងគ្រោះទាំង៣នាក់ត្រូវបានសមត្ថកិច្ចនគរបាលចរាចរណ៍ក្រុងតាខ្មៅ ហៅរថយន្តសាមុយរបស់ស្នងការដ្ឋាននគរបាលខេត្តកណ្តាលដឹកយកទៅសង្គ្រោះនៅមន្ទីរពេទ្យជ័យជំនះក្រុងតាខ្មៅ តែជាអកុសលពេលទៅដល់មន្ទីរពេទ្យជនរងគ្រោះម្នាក់ជាអ្នកបើកបរម៉ូតូ ក៍បានដាច់ខ្យល់ស្លាប់តែម្តង ។ ចំណែករថយន្ត និងម៉ូតូត្រូវបានសមត្ថកិច្ចនគរបាលជំនាញចរាចរណ៍ក្រុងតាខ្មៅធ្វើកំណត់ហេតុដកហូតនាំយកទៅរក្សាទុកនៅអធិការដ្ឋាននគរបាលក្រុងតាខ្មៅ ដើម្បីចាត់ការតាមនីតិវិធីច្បាប់ ៕
