ក្រុងបាងកកៈ ទោះបីជាកងទ័ពប្រទេសថៃ បានសម្រេចប្រកាសប្រើប្រាស់ ច្បាប់អាជ្ញាសឹកនៅថ្ងៃអង្គារនេះ ដើម្បីស្តារនូវស្ថិរភាពសង្គមបន្ទាប់ពីការតវ៉ាប្រឆាំងនឹងរដ្ឋាភិបាលអស់ជាច្រើនខែក្តី ក៏ការដាក់ពង្រាយកងទ័ពចូលទៅក្នុងទីក្រុង និងការចល័តកងទ័ពនេះ មិនមែនជាការធ្វើរដ្ឋ
ប្រហារយោធានោះទេ( Troops deployed in Bangkok as military insists its assumption of responsibility for national security "is not a coup")។ នេះបើតាមវេបសាយអាល់ហ្សាហ្សីរ៉ា បានផ្សាយកាលពីថ្ងៃទី២០ ខែឧសភា ឆ្នាំ២០១៤នេះ។
កងកម្លាំងប្រដាប់ដោយអាវុធគ្រប់ដៃ រថយន្តកងទ័ពបំពាក់ដោយអាវុធ ត្រូវបានចល័តមកកណ្តាលទីក្រុងបាងកក ។កងទ័ពទាំងនេះ ថែមទាំងបានឈរជើង នៅតាមស្ថានីយទូរទស្សន៍ តាមដងផ្លូវ ក្នុងលក្ខណៈប្រុងជើងការកម្រិតខ្ពស់មួយ។ លេណដ្ឋានតាមដងផ្លូវត្រូវគេរៀបចំ និងប្រុងប្រៀបរួចជាស្រេច។
សូមបញ្ជាក់ថា ការបណ្តេញលោកស្រីនាយករដ្ឋមន្ត្រី យីង ឡាក់កាលពីដើមខែឧសភានេះ ដោយតុលាការធម្មនុញ្ញដែលបានធ្វើការកាត់ក្តីដ៏ចម្រូងចម្រាស បានបង្កឲ្យភាពតានតឹងនៅក្នុងប្រទេសកាន់តែកើនឡើងថែមទៀត ក្នុងវិបត្តិនយោបាយថៃនេះ បន្ទាប់ពីការតវ៉ាជាង៧ខែ ដ៏អូសបន្លាយតាមដងផ្លូវ បណ្តាលឲ្យមនុស្សយ៉ាងហោចណាស់២៨នាក់ស្លាប់ និងជាង១០០ នាក់បានរងរបួស។
ទន្ទឹមនឹងនេះដែរ ក្រុមអាវក្រហម ដែលគាំទ្រលោកស្រីយីងឡាក់ ស៊ីណាវ៉ាត្រា ជាប្អូនស្រីលោក ថាក់ស៊ីន អតីតនាយករដ្ឋមន្ត្រីត្រូវគេធ្វើរដ្ឋប្រហារកាលពីឆ្នាំ២០០៦ បានធ្វើការព្រមានអំពីការកើតមានសង្គ្រាមស៊ីវិល ប្រសិនបើអំណាចធ្លាក់ទៅក្នុង មេដឹកនាំដែលមិនបានបោះឆ្នោត តាមការទាមទាររបស់ក្រុមប្រឆាំងអាវលឿង ខណៈក្រុមអាវលឿងចង់ឲ្យមានការ តែងតាំងនាយករដ្ឋមន្ត្រី ដែលមិនមែនជាខ្សែស្រឡាយរបស់ត្រកូលថាក់ស៊ីន ឬក៏ពុំចង់ឲ្យមានការបោះឆ្នោតនោះឡើយ។
ទោះបីជាយ៉ាងណា សេចក្តីជូនដំណឹងដែលត្រុវបានប្រកាសតាមទូរទស្សន៍បញ្ជាក់ថា នេះជាការស្ថិរភាព រក្សាសន្តិសុខសង្គមឡើងវិញ ហើយមិនមែនជារដ្ឋប្រហារនោះទេ។ ប្រជាពលរដ្ឋអាចរស់នៅ រកស៊ីជាធម្មតាចុះ។ ប៉ុន្តែបណ្តាប្រទេសមួយចំនួនបានជូនដំណឺង ឲ្យជនជាតិខ្លួនប្រុងប្រយ័ត្នក្នុងដំណើរទេសចរណ៍ ឬរកស៊ីនៅប្រទេសដែលមានការតវ៉ា រាប់ខែនេះ៕
