សៀមរាប៖ នាចុងសប្តាហ៍ថ្ងៃទី ០១ ខែមីនា ឆ្នាំ២០១៤ នៅរដ្ឋបាលសាលាខេត្តសៀមរាប មានធ្វើកិច្ចប្រជុំមួយ ដើម្បីពិនិត្យ ត្រួតពិនិត្យទៅលើគម្រោងរបស់អង្គការ ចយការ កូរ៉េ ក្នុងការអនុវត្តលើគម្រោងស្តារស្ទឹង ប្រព័ន្ធដាក់លូ និង ស្ថានីយ៍ ចម្រោះទឹកកខ្វក់ ព្រមទាំងគម្រោងពង្រីកផ្លូវនៅមុខសណ្ឋាគារសុខាអង្គរ ការស្ថាបនាស្ពានភ្លោះព្រះរាជដំណាក់ និង ការ បើកផ្លូវឡើងវិញនៅជុំវិញសួនច្បារព្រះអង្គចេក ព្រះអង្គចម ការពង្រីកកំណាត់ផ្លូវពីសណ្ឋាគារស្មាញលីញ មកដល់ផ្លូវ ករដបស្ពានព្រះរាជដំណាក់ និង សម្រួលផ្លូវឌឺហ្គោលទៅអង្គរវត្ត ក្រោមកិច្ចដឹកនាំប្រជុំរបស់ឯ.ឧ ឃឹម ប៊ុនសុង អភិបាល នៃគណៈអភិបាលខេត្ត ឯ.ឧ ប៊ុន ណារិទ្ធ អគ្គនាយកអាជ្ញាធរអប្សរា ដោយមានសមាសភាពចូលរួម ពីទីប្រឹក្សាអប្សរា អង្គការចយការ មន្ទីរ ស្ថាប័ន អង្គភាព មានការពាក់ព័ន្ធ និង ក្រុមហ៊ុនម៉ៅការធ្វើផ្លូវផងដែរ ។
មានប្រសាសន៍បើកកិច្ចប្រជុំនោះ ឯ.ឧ ឃឹម ប៊ុនសុង ក៏បានលើកឡើងពីរបៀបវារៈនៃកិច្ចប្រជុំ ដោយបានធ្វើ ការគូសបញ្ជាក់ ចំពោះគម្រោងរៀបចំប្រព័ន្ធលូទឹកសម្អុយ និង ការស្តារស្ទឹង ព្រមទាំងការពង្រីកផ្លូវក្នុងក្រុង ដោយបានឲ្យបណ្តាអង្គភាពជំនាញ ដែលមានតកព្វកិច្ចក្នុងការដោះស្រាយ រាល់ផលប៉ះពាល់របស់ប្រជាជន ដោយមិនត្រូវធ្វើការរង់ចាំ ឡើយ ដែលជាបញ្ហាធ្វើឲ្យមានការរាំងស្ទះក្នុងកិច្ចអភិវឌ្ឍន៍ក្រុង ព្រមទាំងបានបង្កនូវបញ្ហាក្នុងការកកស្ទះនូវចរាចរណ៍ ទៀតផង ។
ឯកឧត្តមក៏បានឲ្យដឹងផងដែរថា ចំពោះការស្តារស្ទឹងជំហានទី២ ដែលមានក្រសួងធនធានទឹកជាអ្នកអនុវត្ត តែចូលដល់រដូវប្រាំងហើយនូវមិនទាន់បានដំណើរការនៅឡើយ ។ ឯ.ឧ ឃឹម ប៊ុនសុង លើកពីបញ្ហាសេសសល់ ក្នុង ស្តារស្ទឹង ចំពោះបញ្ហាស្ថានីយ៍ចិញ្ចឹមក្រពើ អាជ្ញាធរខេត្តបានកំពុងរកនូវទីតាំង ដើម្បីផ្លាស់ប្តូរកន្លែងថ្មី ក្នុងការប្រគល់ទីតាំងនេះឲ្យទៅគម្រោង( អង្គការ ចយការ) ធ្វើការអភិវឌ្ឍន៍ស្ទឹងប្រវត្តិសាស្ត្រ ក្នុងនោះក៏ធ្វើការពង្រីកស្ពានអាងក្រពើផង ដែរ ។
ចំពោះបងប្អូនប្រជាពលរដ្ឋទាំង៥គ្រួសារនៅជាប់អាងក្រពើ ដែលពួកគាត់ពុំបានគោរពទៅតាមគោលការរបស់ គណៈកម្មការដោះស្រាយ ក៏អាជ្ញាធរខេត្តត្រូវធ្វើការដោះស្រាយជាបន្ទាន់ផងដែរ ។ ក្នុងនោះដែរតំណាងគម្រោងរបស់ (ចយការ) និង ក្រុមបច្ចេកទេស ក៏បានធ្វើការបង្ហាញទៅលើគោលការណ៍គ្រឹះ នៃគម្រោងបី លើការដាក់ប្រព័ន្ធលូក្រោមដី ការគ្រប់គ្រងទឹកកខ្វក់នៅក្នុងក្រុងសៀមរាប ដោយមានស្ថានីយ៍ចម្រោះទឹក កខ្វក់ មុននឹងបញ្ចេញទឹកទៅធ្វើការស្រោចស្រពផលដំណាំកសិកម្ម ឲ្យអស់សុពលភាពមុនហូរចាក់ទៅបឹងទន្លេសាប ។
ក្នុងនោះជំនាញការបច្ចេកទេសនៃគម្រោង របស់អង្គការ(ចយការ) ក៏បានបញ្ជាក់ផងដែរ ពីគម្រោងប្រព័ន្ធទឹកកខ្វក់ និង គម្រោងស្តារស្ទឹងសៀមរាប ។ បន្ទាប់ពីលោកប្រធានមន្ទីរសាធារណការនឹងដឹកជញ្ជូនខេត្ត ធ្វើការបង្ហាញនូវគំនូសប្លង់ ក្នុងការពង្រីកផ្លូវ និង ស្អាន នៅក្នុងក្រុងសៀមរាប ក្នុងការសម្រួលទៅដល់ចរាចរណ៍ទៅមកនៃយានយន្តគ្រប់ប្រភេទ ដើម្បីបញ្ជៀសនូវការកក ស្ទះចរាចរណ៍ក្នុងក្រុងប្រវត្តិសាស្ត្រមួយនេះ ។
ព្រមទាំងការបង្ហាញនៃគម្រោងពង្រីកកំណាត់ផ្លូវជាតិលេខ៦ ពីសណ្ឋាគារ ស្មាញលីញ មកដល់ករដបភ្លើងស្តុបកោះកេរ្តិ៍ ផងដែរ ។ ក្នុងកិច្ចពិភាក្សា ការផ្តល់យោបល់ របស់ទីប្រឹក្សាអាជ្ញាធរអប្សរា និង មន្ទីរជំនាញដែលមានការពាក់ព័ន្ធ ក៏បានគូស បញ្ជាក់ថា រាល់គម្រោងដែលបានលើកឡើងពីការពង្រីកផ្លូវ និង ស្ពាននោះ កិច្ចប្រជុំទាំងមូលក៏បានឯកភាព ព្រមទាំងសូមឲ្យមន្ទីរទទួលបន្ទុក ក៏ដូចក្រុមហ៊ុនម៉ៅការ ក៏ដូចកងវិស្វកកម្មសម្តេចតេជោ សូមជួយរក្សានូវរចនាបទដើម នៅពេលធ្វើស្ពានភ្លោះអមស្ពាន ព្រះរាជដំណាក់ ដែលមានអាយុកាលជិតមួយសតវត្សហើយ ។
ក្នុងនោះក៏បានផ្តោតទៅលើបញ្ហាទឹកជំនន់ នៅតាមដងស្ទឹងសៀមរាប ដែលគម្រោង អង្គការចយការ អនុវត្តកន្លងមក ។ មានប្រសាសន៍នោះដែរឯ.ឧ ឃឹម ប៊ុនសុង ក៏បានឯកភាព នូវរាល់មតិរបស់អង្គប្រជុំលើកឡើង ព្រមទាំងបានដាក់នូវផែនការមួយចំនួន ដល់បណ្តាមន្ទីរ ស្ថាប័ន អង្គភាពពាក់ព័ន្ធទាំងអស់ ត្រូវធ្វើការប្រតិបត្តិឲ្យបាន លើការដាំឡើង វិញនូវដើមឈើលម្អតាមដងផ្លូវ ដែលបានធ្វើការពង្រីក និង ត្រូវរៀបចំសណ្តាប់ធ្នាប់ជាបន្ទាន់ ក្នុងពេលដែលកំពុងធ្វើការ ពង្រីកផ្លូវ ក្នុងបញ្ជៀសការកកស្ទះចរាចរណ៍ក្នុងក្រុង ។
ក្នុងនោះមន្ទីរជំនាញ និង ក្រុមហ៊ុន ក្នុងការស្ថាបនាផ្លូវ ត្រូវយក ចិត្តទុកដាក់ខ្ពស់ ក្នុងការស្ថាបនាផ្លូវ ដើម្បីធានាគុណភាពផ្លូវប្រើប្រាស់បានយូរអង្វែង ព្រមទាំងធ្វើការដាក់ភ្លើងបំភ្លឺ តាម ដងទ្រូវផ្លូវ ក្នុងការធ្វើឲ្យសោភ័ណភាពក្រុងមានការស្រស់ស្រកាលឡើងថែមទៀត ។ ឯ.ឧ ឃឹម ប៊ុនសុង ក៏បានគូស បញ្ជាក់ទៀតថា ការធ្វើស្ពានភ្លោះជាប់ស្ពានព្រះរាជដំណាក់នោះ ឯកឧត្តមក៏បានឯកភាពទៅតាមប្រសាសន៍របស់អាជ្ញាធរ អប្សរា និង ការពង្រីកផ្លូវ ឌឺហ្គោល ពីមុខរាជដំណាក់សៀមរាបទៅកាន់ប្រាសាទអង្គរ ព្រមទាំងត្រូវធ្វើការបើកផ្លូវទាំងអស់ នៅជុំវិញសួនច្បារព្រះអង្គចេកព្រះអង្គចម និង មាត់ស្ទឹង ដែលមហាសណ្ឋាគារអង្គរ បានបិទកន្លងមក ក្នុងការសម្រួល ការកកស្ទះចរាចរណ៍ក្នុងក្រុងផងដែរ ។
ឯកឧត្តមក៏បានធ្វើការជម្រុញដល់មន្ទីរជំនាញ ក៏ដូចកងវិស្វកកម្មសម្តេចតេជោ ត្រូវខិតខំ ក្នុងការស្ថាបនាពង្រីកផ្លូវនេះឲ្យបានរួចរាល់នៅមុនថ្ងៃបុណ្យចូលឆ្នាំថ្មីប្រពៃណីជាតិខ្មែរយើងនាពេលខាងមុខ ហើយក៏ជាប្រធានបទនៃការប្រឡងណាំងទីក្រុងស្អាតផងដែរ ៕
