ភ្នំពេញ៖ បងប្អូនប្រជាពលរដ្ឋបានសហការជាមួយនគរបាលប៉ុស្ដិ៍បឹងព្រលឹតចាប់ឃាត់ខ្លួនបានជនសង្ស័យ២នាក់ ក្នុងនោះម្នាក់ជាស្រីនិងដកហូតម៉ូតូម៉ាកស្ទេបមួយគ្រឿង ខណៈជនសង្ស័យទាំង២នាក់នេះធ្វើសកម្មភាពឆក់ខ្សែក ពីស្ត្រីម្នាក់កំពុងជិះម៉ូតូពីក្រោយប្តីបានសម្រេច កាលពីវេលាម៉ោង២១និង៣០នាទីយប់ថ្ងៃទី២២ខែឧសភា ឆ្នាំ២០១៤ ស្ថិតនៅចំណុចផ្លូវលេខ២៧៨កែងផ្លូវលេខ១១៣ ក្នុងភូមិសាស្ត្រសង្កាត់បឹងកេងកងទី២ ខណ្ឌចំការមន។
យោងតាមប្រភពព័ត៌មានពីសាក្សីនៅកន្លែងកើតហេតុបានឲ្យដឹងថា ដំបូងឡើយស្ត្រីជាជនរងគ្រោះបានជិះម៉ូតូមួយគ្រឿងជាមួយប្តីរបស់នាង ធ្វើដំណើរចេញពីផ្ទះនៅម្តុំផ្សារកណ្ដាលបំណងមកហួបស៊ុបនៅក្នុងខណ្ឌចំការមនដោយធ្វើដំណើរតាមផ្លូវលេខ១១៣ ក្នុងទិសដៅពីជើងទៅត្បូងលុះដល់ចំណុចកែងផ្លូវលេខ២៧៨ ស្រាប់តែលេចមុខជនសង្ស័យពីរនាក់ប្រុសម្នាក់ស្រីម្នាក់ជិះម៉ូតូស្ទេបមួយគ្រឿង ពណ៌ក្រហម ពាក់ស្លាកលេខភ្នំពេញ1AE-4681 ជិះមកក្បែរស្ត្រីរងគ្រោះ។
ភ្លាមនោះជនសង្ស័យម្នាក់ជាស្រីដែលជិះពីក្រោយបានធ្វើសកម្មភាពឆក់ខ្សែក ពីស្ត្រីរងគ្រោះបានសម្រេចរួចក្រុមជនសង្ស័យបានជិះម៉ូតូគេចខ្លួនចូលទៅក្នុងភូមិសាស្ត្រខណ្ឌ៧មករា ប៉ុន្តែភ្លាមៗនោះជនរងគ្រោះនិងប្រជាពលរដ្ឋបានជិះម៉ូតូដេញតាមរហូតដល់ចំណុចផ្លូវព្រះសីហនុក្នុងសង្កាត់បឹងព្រលឹតក៏ត្រូវនគរបាលកំពុងជិះល្បាតដេញស្ទាក់ចាប់បានទាំង២នាក់ភ្លាមៗ ។
ប្រភពដដែលបន្តថាដោយយោងទៅតាមវត្ថុតាងជាក់ស្តែងនគរបាលមូលដ្ឋានប៉ុស្តិ៍បឹងព្រលឹតប្រគលជនសង្ស័យទាំង២នាក់នោះទៅឲ្យនគរបាលប៉ុស្តិ៍បឹងកេងកងទី២ដើម្បីធ្វើការសាកសួរជុំវិញករណីខាងលើនេះ។ សមត្ថកិច្ចបានបញ្ជាក់ថា ជនសង្ស័យកំពុងធ្វើការសាកសួរនៅទីស្នាក់ការប៉ុស្តិ៍ដូច្នេះសមត្ថកិច្ចមិនទាន់អាចបញ្ជាក់ពីអត្តសញ្ញាណជនសង្ស័យនិង
ជនរងគ្រោះបាននៅឡើយទេ។ប៉ុន្តែជនសង្ស័យត្រូវកសាងសំណុំរឿងបញ្ជួនទៅឃុំខ្លួននៅអធិការដ្ឋាននគរបាលខណ្ឌចំការមនរងចាំបញ្ជួនបន្តទៅសាលាដំបូងរាជធានីភ្នំពេញដើម្បីផ្តន្ទាទោសតាមច្បាប់៕
